إخِذْنِي وْيَاك..

إخِذْنِي وْيَاك مِنِّي شْعِنْدِي بَاقِي وْيَاي

خَلِّيْنِي وَلَوْ چِلْمَه بْطَارِف الشِّفَّه

وِاتْصَدَّقْ عَلَيَّه بْچِلْمَة اهْوَاك

أصَدِّگْ بِالچِّذِب لَو مِنَّك تْألْفَه

إخِذْنِي بْلا قَصِد بِالصِّدْفَه اخِذْنِي وْيَاك

مُو عِيْبِ الْيُوَادِدْ خِلِّه بِالصِّدْفَه

إخِذْنِي ويَاك جَرُّب وِانْتَه مَا خَسْرَان

اخِذْنِي بْفَيْ دَلَالَك نَارِي خَل تِطْفَه

حُبَّك چَان سِرْ وْگِلِت مَا يِنْشَاف

ثَارِي الحُب فُضِيْحَه وْأبَد مَا يِخْفَه


تَرِف لِفْنِي عْلَى خُصْرَك بَاگَة وْرُوْد

واخِذْ مِنِّي العِطُر لِخْدُودَك التَّرْفَه

إخِذْنِي وْيَاك سَلْوَة بْسَاعَة الضِّيْج

واخْبُطْنِي وْيَه دَمْعَك خَاطِر تْذِرْفَه

مَارِيْد العُمُر خَلِّيْنِي ادِمْجَه وْيَاك

حَتَّه بْيُوم بُعْدَك رُوْحِي تِتْوَفَّه

شَوَصْفَك يَا بَحَر والسُّفُن بِيْك تْلُوْذ

صَار سْنِيْن تِبْحِر مَا لِگَتْ ضِفَّه

وْشَگِلَّك يَا شَمِس تِضْوِي الْلَّيَالِي السُّوْد

حَـتَّـه الـنـَّارْ تِـْبـرَد بِـيْـك تِـدَّفّـــَه





عَطْشَان شْكِثُر مِعْتَاز رَشْفَة مَاي

وبْشِفْتَك نَهَر بَس مِنْهُو اليْغُرْفَه

لِأن دَرْبَك عَسِر وِيْتَيِّه الـمَاشِيْن

وصَعُب نِمْشِي بْطَرِيْق وإحْنَه مَنْعُرْفَه

بْمِيْزَان الحِسِن وِزْنُوك وَيَّه النَّاس

دَگَّتْ ولْجَمَالَك رِجْحَت الكَفَّه

مِثَل عَصْفُور بَلَّل جِنْحَه دَمْعِ العِيْن

وْبَس عِشَّك لَچَن يِگْدَر يْنَشْفَه

يَا تَالِي الـمِزِن وِلْنَثِّتَك مِحْتَاج

ضُمَتْ گَاع الصَبُر مِحْتَاجَك بْلَهْفَه

ذِبْنِي بْفَيْض عَطْفَك واحْسِب سْنِيْن

بَلْچِي رْوِيْحِتِي منِ الحَسْبَات تِشْفَه



وِلَك ذِلْنِي بْهَوَاك وْصِيْر اِليَّه الْلِّيْل

مِنُو الْيِگْدَر يِبَات بْلِيْلَك وْيِغْفَه

وْمَشِّيْنِي عْلَى رَايَك مَا أگلَّك لِيْش

وَلَا أنْدَم وَاگِل لْرُوحِي يَا وَسْفَه

إخِذْنِي ويَاك اِخِذْنِي وحَتَّه اسُولِف بِيْك

وَاگِــل للنَّاس جَرْحِ جْفَاك مَا يِشْفَه

أنْدَار عْلَى عُمْرَك بَس اخِذْنِي ويَاك

إخِذْنِي مِن حَيَاتِي الطَّاغْيَه الصَّلْفَه

تُعْرُف لِيْش أحِبَّك رَاح اگِلَّك لِيْش

چِيْ لَنِّي العِلِيْل وْبِيْدَك الوَصْفَه.......
**********
*****
إخِذْنِي وْيَاك.....