رضيت بالحزن عمر وبالمواجع خليل

وقدرت اعيش بحيـاةٍ باهـتٍ لونهـــا

عودّت نفسي مدامي جيت عابر سبيـل


كل ما دهتني مصيبـه قلـت ياهونهـا


عاصرت من دورة الأيام شـيٍ مهيـل


ومريت بـدروب غيـري مايمرونهـا


من كثر ماشلت ماباقي بجوفي مشيـل


روحي تدور معين ولا لقـت عونهـا


كم شجرةٍ جيت أدور لي تحتها مقيـل


وحتت ورقها وعرّت فوقي غصونهـا


واليا رميت الهموم بسهم صبراً جميـل


اما يجـي خلفهـا والا يجـي دونهـا


اسمع بصدري صياح وهمهمات وعويل


وأردها خايـفٍ لا النـاس يوحونهـا


من غربة الروح ضيعت الهدى والدليل


وخطاي تاهـت ولابـه مـن يقدونهـا


نهاري أعتم وليلـي بالتعاسـه طويـل


الكون مشرق وروحي مظلـمٍ كونهـا


هذي علومي بعد فقد الظـلال الظليـل


مالي من الـدور خاويهـا ومسكونهـا


زهدت في عيشتي بعد ام طرفٍ كحيل


ياليتي ادري بتالـي الوقـت وشلونهـا


عهدي بها يوم تروي قلبـي السلسبيـل


من قيظ الأيام توردني علـى عيونهـا


وتفيض في قلبي الظميان شوق وتسيل


وأروى ولا أروى وأعود أظما لماعونها


وان سولفت كني أسمع للحمايم هديـل


وأقوم أغنـي لهـا والاحـي لحونهـا


كان اختصار الأنوثه في جسدها النحيل


يلغي جميـع النسـا بعيـون مفتونهـا


كنا سوى والزمن بالوصل مده جزيـل


ذقنـا حـلاة الحيـاه اللـي يقولونهـا


ومن ذاق قلبه حنان منقضات الجديـل


والله لتشتالـه الدنيـا علـى متونـهـا


وانا بعد ما أهتنيت أقفت وحل الرحيـل


وياويل حالـي ليـا قامـو يطرونهـا


بابقى عليـلٍ يحركـه النسيـم العليـل


لاهب في قاع روحـه جنـت جنونهـا


ومادام راحت مابي من حلمي الا القليل


أن عشت في قلبها وان مـت فعيونهـا










>> السيحاني لـ مرزوق العتيبي